Bəziləri deyir ki, siqaret çəkmək dini baxımdan haramdır. Bu fikir doğrudurmu?

Hər şeydən əvvəl qeyd edək ki, siqaret çəkmək sağlamlıq baxımından ziyanlıdır. Siqaret çəkməyin bioloji ziyanları elm tərəfindən çoxdan sübuta yetirilib. Orqanizmdən asılı olaraq, bu ziyan bir şəxs üçün həddən artıq təhlükəli, digər şəxs üçün az təhlükəli ola bilər. Bundan əlavə, siqaret maddi baxımdan da insana ziyan gətirir, siqaretə xərclənən gündəlik pullar ailə büdcəsindən çıxılır. Lakin siqaret çəkməyin dini baxımdan hökmü barədə fikirlər müxtəlifdir. Bir qrup alimlər siqaretin sağlamlığa ziyan olduğunu əsas gətirərək, onu qəti şəkildə haram bilirlər. Bunların arasında əhli-sünnə (daha dəqiq desək, sələfi-vəhhabi) alimləri üstünlük təşkil edir, amma bəzi az sayda şiə alimləri də bu fikri dəstəkləmişlər. Əksər alimlərin fikrinə görə isə, siqaret çəkmək bəyənilməz əməl və vərdiş olsa da, öz-özlüyündə günah (haram) deyil; amma əgər bir şəxsin sağlamlığına ölümcül təhlükə törətdiyi sübuta yetərsə, onun siqaret çəkməsi öz canına qəsd etmək sayılar və günah olar. Bəzi alimlər siqaret çəkən şəxslərin bu vərdişi davam etdirməsini icazəli bilmiş, amma əvvəllər siqaret çəkməmiş adamın buna başlamasını haram saymışlar. Hər bir halda, müsəlmanın bu zərərli vərdişdən çəkinməsi daha yaxşıdır.

 

islam.az